社創基金與政府青少年網站(Youth.gov.hk )首次合辦社創CEO大專賽，決賽喺剛過去嘅周末舉行，結果冠軍由城市大學學生組成的「歲閱悠遊」隊伍奪得，同場佢哋仲贏得「社會創新『諗』頭獎」及「現場投選最想實現社創好橋獎」㖭！
到底乜嘢好橋令佢哋能夠連奪3個獎項咁犀利？就係舉辦香港地道嘅導賞團，其特別之處是會聘用熟悉該區的長者當導遊，並與大專生合作，帶領參加者從多角度感受社區文化。
得獎嘅同學話，近年跨世代間有不少矛盾，好似「關愛座」引起熱議，都係因為彼此唔夠了解，所以希望透過活動打破兩代的隔膜，亦讓長者有機會發揮所長賺取薪酬。佢哋仲話香港有好多社區故事，例如柴灣有3個名，唔係搞呢個計劃都唔知呢！
大會話今次比賽反應熱烈，共收到139份營商計劃，冠軍得主就喺賽事中奪得共17萬元創業啟動基金，將於今年內在社區中實踐有關計劃。有興趣嘅朋友不妨留意吓。