英國首相文翠珊
英國May姐一於硬去，因為佢知道，退歐方案已無退路。歐盟嗰邊擺明唔會再傾，而佢就曾經大想頭，想用疲勞轟炸，每個星期都夾個方案畀國會議員投票，迫國會議員響死線之前含淚通過。點知早幾日議長一句：喂！有條國會規矩，唔可以同一個議案推上國會無限次投票。May 姐呢招唔work，死火。
英帝政局，一直未變。依家反歐之保守黨悍將，點都要佢同歐盟傾一個全面切割的套餐。傾唔到呢？反歐悍將話，可以支持延遲退歐之方案，等May姐可以返去歐盟傾多些嘢翻來。不過好似話，條件係：May姐，唔該你講清楚，肯唔肯響國會投票前辭職。
講到尾，都係要夾盡May姐，搾乾佢政治本錢然後叫佢彈開。英帝政治之「文明」，因為佢地傾政治，近二百年都唔用槍炮，而係響國會議事堂互劈互打。呢啲好似好文明，但如果你追落去佢地的互劈細節，言語間就係刀光劍影，見血封喉。香江嗰啲大叫大嚷最後畀保安帶走嗰啲議員，水平真係……。
May姐搞唔掂，英帝經濟得唔得呢？早日英鎊仲堅挺，證明金融佬都見慣風浪，知道英國佬作風，素來都係船到橋頭自然直。美帝亦然，大家日日睇中美貿易戰刀光劍影，以為貿易戰係美帝政治的top agenda，傻啦，都係國內問題多啲。講到底，選舉就係國內問題。美帝選舉戰場，往往就係一些價值問題之爭論，例如性別平等權利，種族問題等等。美帝強國傾成點，選民唔多理。不過，侵侵又唔介意拖住傾。因為依家強國出來的經濟數據唔係咁好，美帝仲唔借機踩多幾腳？
所以，泛民朋友去美帝都唔應該開心住。舊年本欄仲提過大家，話美帝會借港制中，綠營會借民(主派)制中，講完之後仲畀網民調侃。其實做prediction嘅嘢，大家睇專欄都應該抱著輕鬆心情去睇，唔使咁上心，真係炮炮去鬧作者無料到咩！不過，大早舊年提過大家美帝是動真格，今次大家應該相信了吧？
中美大戰，香江受靶，如果大家舊年已經作了準備，真係恭喜大家。但如果依家重新部署都未算太遲。美帝策略係點呢？今日泛民有三件代表去了美帝華盛頓。無嘢嘅，依家美帝做嘅，就係要夾最有機會做親侵盟友之香江泛民表態，要佢地唔好再好似以前咁樣，一面扮反中，一面扮親美，響美帝面前反中，響北京面前扮有理有節愛國不愛黨。依家美帝係要泛民表態，親美定傾中？無得好似以前咁玩假，借中美和好抽水。
美帝夾完泛民後，下一步就會夾商界表態：唔好又響強國扮反美，響美帝面前扮反中食兩家茶禮。跟手呢，就一步一步地，隨著商界要選邊站，好快輪到中產。我知總有人會窒我危言聳聽，不如又睇下點？