有冇人係用過外賣App超過10次(無論任何品牌)，而仍然係覺得佢哋嘅服務都係稱心滿意，每次食外賣時條氣都好順，食完想提自己下次俾多啲Tip屎個送外賣人員㗎？有冇㗎？我周圍問過人，再加上我大量個人經歷總結，我懷疑係冇㗎。
有間我喜愛食嘅餐廳係某外賣App獨家，所以我多數都係用其中一間嗌外賣。除非你係喺「真正完全唔繁忙，餐廳都得閒到R緊腳趾」嘅時段嗌外賣，否則我差唔多未試過準時收到過外賣。而個外賣App知道自己遲會認衰，然後叫你等多一陣。而我最憎人「二次遲到」，即係咩呢？即係你已經遲到，然後Say sorry話自己半個鐘後會到，點知你半個鐘後再遲到，咁就已經係「二次遲到」。即係你都自己知道遲到令人難受，你下次再約人係咪應該反省咗自己，然後先再約多次人，你就唔應該再遲？但我用開嗰個外賣App，就「二次遲到」係基本，你唔好彩嗰時「三次/四次遲到」都有。
有一次，佢遲到，我再望下隻App，佢聲稱……餐廳正在準備我嘅食物。咁我梗係又有啲嬲，諗住打去餐廳問下咩事搞咁耐。打去餐廳一Check，佢話：「一早整好咗喇，冇人嚟拎呀！」我仲嬲得勁咗。今次唔關餐廳事，亦未去到送外賣人員度，本身隻App已經係欺騙緊我！食物一早整好，就話未整好，因為佢怕我發現佢啲送外賣人員未到，想將個波射俾餐廳。然後我又想問，我啲嘢食，係咪一秒一秒變凍緊？啲麵係咪努力吸緊啲湯，嚟到會唔會發脹到變咗筷子咁粗？
最可怕係……唔好話下下投訴咁港豬啦，你有時只係想查詢下，你係搵唔到任何電話號碼，你搵到啲半機械人同你文字對答，佢用Template文字答完你一輪，最後會自動Cut你線。你好嬲，再加上肚餓，你會更嬲。我問過身邊所有人，呢啲事情絕對唔係獨家，所有App都差唔多。每張外賣單收貴我幾十蚊，衰啲講，「性價比」仲衰過以前直接打去餐廳叫外賣，最起碼佢冇收貴我咁多，而且我有咩可以直接打去問，人哋遲到都識親口講句「唔好意思」吖。
《黑紙》《100毛》《毛記電視》共同創辦人
