高雄市罷Korean Fish，本周應該係攻防戰。Korean Fish已經向市民道咗歉，但係似乎市民唔收貨。究竟應該點樣拆呢？藍營大老就好似闊佬懶理咁樣。佢地有乜嘢招數呢？原來佢地想到，係以不變應萬變，叫大家唔好去投票。即係呢，由於罷免嘅第一個門檻係投票率。如果個個支持Korean Fish嘅人唔出去投票，咁就可以好大機會過唔到投票率的門檻。
呢招冷處理係玩真定玩假呢？正常嘅玩法，應該係藍營將件事，變成一場藍綠大對決。兩黨將件事上升到生死之戰，然後互相大造勢，扯高件事嘅層次。點知依家藍營一反常態，咁都好明顯睇到人走茶涼。舊年Korean Fish氣勢爆上，藍營個個視如上賓，候選人排住隊同佢影相。依家Korean Fish想搞抗疫大聯盟，影張相之嘛，個個好似見到麻瘋病人咁樣彈開。即使今次罷韓失敗，未來兩年，Korean Fish就會成為政治dead wood。
搞政治唔係玩泥沙。Korean Fish快上快落，證明人民眼睛畢竟雪亮，最終冇俾呢個政治奇兵殺上去做總統。但一生人，總會遇上幾個衰人。選民何嘗唔係？選舉投票，點都會遇上一兩件巧言令色嘅政客。英國波叔係唔係衰人？當然係啦，佢做倫敦市長嗰時，真係政績欠奉，一路殺上去，都係靠走位靈活，及時轉身改跑道，忽然成為脫歐闖將，響開心迎脫歐之後，就俾疫情打到損手爛腳。
波叔面對疫情失控，最緊要就係要振興經濟。英帝唔會死錯人。佢地嘅計算，往往係最盡。全世界最有錢嘅地方，唔係美帝就係北方大國。英帝之前，同北方大國做好朋友，搵到大把著數。依家呢？美帝轉咗侵侵之後，侵侵決定同北方大國反枱，初時侵侵仲話想叫埋英帝一齊去制中，英帝真係轉頭冇理佢，搞到侵侵發晒茅。依家疫情快完，波叔為咗要重振經濟，左思右度，最後都係埋去同美帝搞埋一齊。咁美帝依家同北方大國開拖，英帝終於選擇同侵侵一起，局勢又唔同咗。早前侵侵講過，要用英帝簽貿易協議，即係幫英帝搞經濟。另一邊，波叔預咗冇北方大國呢支水喉，都要搵多啲其他水喉，同埋人才啦。講到呢度，英帝俾香港BNO有英帝工作等權利，表面上有好多人道理由及道理，但係，你估真係完全講道義責任咩？其中最重要嘅，就係經濟理由。當香江經濟因為美帝制裁而陰乾的話，人才同錢財，無得發展，咪走去第二度囉。一個BNO家庭，帶一千幾百萬港紙去英帝，真係對英帝有即時嘅經濟刺激，而且，香江人一定會感恩保守黨，係咪？大家可能唔知，BNO響英國係有權投票㗎。
以前英帝嘅移民政策，要睇歐盟臉色，依家脫咗歐，海闊天空。至於係未真係俾BNO有響英帝工作等居留權利？唔好抱住咁大期望啦，英帝嘛，信咪信囉。
倫敦大學亞非研究學院法律系博士