Lockdown呢個字，日日見。美帝面對前所未有的壓力，侵侵總統身邊嘅白宮官員都有中招。總統表面唔驚啫，但萬一中招就大件事。民調睇到，民主黨拜登有追趕之勢，侵侵有啲心急，矛頭指向北方大國。呢一點，民主共和兩黨都有共識。
拜登同黨內左翼桑德斯招手(or vice versa)，是但啦，總之依家有合作聯盟。桑德斯支持者陸續加入拜登嘅團隊以示團結。究竟係未「真加入假支持」，口和心不和，唔知矣。因為有民主黨支持者嘅評論話，如果最終民主黨內各派系唔能夠整合，好似上屆咁樣將票射落海，最終得益者都係侵侵云云。如果你係香港民主派支持者，呢一句說法似曾相識，係未？
問題係，你睇下拜登嘅說法。佢係攻擊侵侵口頭硬心太軟，即係把口鬧到北方大國飛起，但係行動方面就影都冇。不過，拜登冇講到佢將會點樣對付北方大國。各位看官：咪當民主黨係傻嘅，佢地咁樣講，梗係有計算啦。民主黨素來同北方大國嘅上上下下都有朋友。佢地素來都冇大力打擊北方大國之往績，講到口硬心軟，拜登後面嘅民主黨精英更犀利。如果侵侵成功將民情轉移，美帝人民個個都憎北方大國，要強硬派登場，咁自然會搵共和黨。依家又有人提議，如果疫情持續，不如押後總統選舉。吓？近日有兩場地區補選。威斯康辛州同加州方面，共和黨贏咗。
英帝首相波叔冇向商界屈服。因為佢最終都冇放寬太多限制。查實英國今次疫情一鑊粥，民情開始追究責任。如果唔係波叔曾經入院，相信上個月已經會轟佢落台。依家佢地有樂觀嘅想法，就係爭取六月後，可以逐步放鬆限制。經濟指標方面，英美都唔樂觀，但更重要嘅係，英帝會點樣振興經濟，波叔完全交唔出功課。好多人會講，英帝會利用反對北方大國來做責任轉移，懲罰北方大國？咁又未必。英帝政治作風唔係大開大合，唔會大大聲做嘢，佢地最叻係靜靜雞做事，然後枱底做你世界。
520在即。台灣周邊事態好忙。東海、南海、台海都局勢火爆。English Choi係未全力同北方大國開火？咁又未必。聽嗰邊報道，話520方面， English Choi會整一個新嘅和平框架，同北方大國傾下。咦！北方大國唔係同English Choi 擘晒面？唉！兩岸政治唔係枱面嘅嘢，枱底互動最緊要。早排有傳，有人響廈門去咗台北，之後又冇隔離返番去廈門。 English Choi政府冇承認又冇否認。呢個人去做乜嘢呢？
之前阿扁年代，佢嘅就職演辭，事前有同北方大國溝通。咁English Choi會唔會咁樣做呢？武漢包機呢件事可以睇到，北方大國同English Choi政府可以有得傾嘅，如果唔係，飛都冇得飛。大家記住：北方大國對台呢，唔係一味鬧，一樣有偈傾，唔係鐵板一塊。
倫敦大學亞非研究學院法律系博士