早前新城財經台名嘴香樹輝(香Sir)宣布今年3月尾掛咪，不再主持早晨王牌節目《香樹輝King King傾》，退休逍遙。Ray收到風，電台已經搵到接班人，就係am730專欄作家何民傑，兩人昨日仲一齊出席新城財經台20周年台慶活動，兩代主持趁機拍返張合照。根據維基百科，何民傑屬於政治人物，曾涉足政壇，做過區議員，又是大專通識講師及107動力召集人，瓣數多多，佢而家都有主持新城知訊台節目，主持經驗同應變能力毋庸置疑，相信佢除咗會關注一般社會熱門議題外，亦會聚焦多D社交平台話題，及新經濟及新科技範疇，例如fin tech及電子貨幣呢類題目。不過，遲下佢就要朝朝7點鐘準時開咪，足足兩個半小時，即係天未光就要起身，真係少D自律能力都唔得！
據Ray所知，新節目4月開始，而節目名仲未最後定案，大家有心水仲有時間提出㗎。至於香Sir，Ray喺度祝佢退休生活愉快，得閒可以玩票性質開咪講下波馬都十分正喎！