唔好意思，上周甩咗底。不過好彩真係甩底，如果唔係都唔會估到北韓金仔同美帝侵侵之會面，乜嘢成果都冇。事隔一周，爆料者講，原來侵侵響上機前，已經收到風，金仔靜靜雞已經重新搞番核設施，金仔疑似「講大話」，咁佢仲應唔應該上機呢？後來英明神武宇宙最強嘅侵侵都堅持去河內睇吓得唔得，點知佢發覺金仔真係呃佢，冇承認佢地靜靜雞搞番核設施，於是侵侵就「拔喉」鬆人云云。
咁樣講都係為咗顯示侵侵仲係一切盡在掌控之中，所謂跌落地都要攞番撮沙。冇所謂啦，唔通叫佢老人家承認佢誤信金仔咩。因為聽聞侵侵身邊哼哈二將之一嘅博爾頓，響老人家出發去河內之前，都已經同佢講，金仔信唔過……。
今年開始，侵侵點都要響外交上有啲achievement，如果唔係，侵侵外交捧蛋真係相當難睇。北韓衰咗，證明佢印太新外交跌咗一跤，咁如果侵侵嘅美洲新秩序都搞唔掂，仲大件事。博爾頓近兩個星期之社交推特嘅訊息，大部分都係委內瑞拉。響美帝力撐下，委國反對派瓜伊多，果然未瓜得，響鄰國打晒招呼之後，已經回國。委國總統馬杜羅仲係響度冇瓜得，似乎係戰情膠著。如果咁樣落去，委國仲要一啲時間先至有一個明朗之結果。老實，伊伊今次真係不容有失。如果委國因為咁樣仲未可以變天，咁侵侵上台以外，佢嘅世界新秩序真係乜都做唔到，冇政績。外交冇政績，侵侵好難選噃！
亞太，sorry，依家美帝叫印太新經濟秩序，其中一個目標係打低北方大國的氣勢。咁印度有大選，美帝睇到實，一切都要大選後先至可以再傾，借印打中暫時hold住。所以，既然要全力對付北方大國，梗係要打香港牌。以前個個都唔信美帝會打香港牌，用《香港政策法》搞大國，點知依家真係成真。美帝潛台詞係捧高港美關係，將中(港)美關係變成中美、港美之三角關係。咁搞法，香港人就成為磨心囉。即係咁：以前香港問題係京港之內政問題，美帝係要將香港問題國際化，形成一個中美加香港之三角格局。咁樣落去，美帝叉隻腳落嚟，香港人呢條船要小心呀。
轉個頭，英國May姐仲係好頭痕。今個月係未可以正式離開歐盟？英國佬各政客仲係計算緊點樣響今次脫歐問題上拿盡好處。May姐要想方法擺平疑歐派之批評，覺得May姐非常軟弱，為咗可以退歐就向歐盟讓步，而另外唔少商界覺得，May姐咁樣同歐洲一刀兩斷，真係冇生意可做。May 姐又為了拿工人之支持，突然又話會畀多些錢去支援受脫歐影響工作之城鎮工人。May姐真係章法大亂，咁樣落去，佢個方案要響國會通過，都係要等候奇蹟。不過曼聯都可以翻生，May姐我估都得嘅，係未？