無綫外事部前副總監曾醒明嘅退休生活真係豐盛，早前佢就同藝人李雨陽等一行19人，跟隨香港愛心親善團前往泰北探訪咗一個星期，圓滿達成「送炭到泰北」使命。期間，適逢李雨陽生日，大家仲喺當地幫佢舉行咗一個既感動又有意義嘅生日會㖭！
曾醒明向Ray講，此行主要係為清萊滿星疊大同中學嘅改善工程落成主持揭幕，並出席該校嘅畢業典禮。佢仲話今次有5項工程落成，有助改善逾千學童學習及衛生環境。
至於今次有份同行的壽星李雨陽，已經連續3年隨團到訪泰北山區，當大家探訪泰緬邊陲貧困學校及孤兒院期間，適逢李雨陽生日，曾醒明就特別為佢搞咗個生日會，不過喺當地無蛋糕喎！曾醒明就立即諗到用派發禮包中的餅乾，砌成克難式餅乾生日蛋糕，仲點埋蠟燭，加上近百學童孤兒齊唱生日歌。大家以餅乾代替蛋糕，過了一個別開生面又難忘的生日，令李雨陽大受感動。
曾醒明仲話，今次到泰北探訪嘅愛心團體仲包括：九龍總商會、又一村獅子會、半山扶輪社、麥羅武慈善基金、光華康體會、華欣文教基金及莒光文化服務中心等。