由旅發局主辦的「香港電競音樂節」(EMF)，下月4至6日假紅館舉行，屆時場外空地設有Festival Zone嘉年華，大玩懷舊遊戲，啱晒一家大細參與。Ray昨出席傳媒預覽，被幾部「大牛龜」古老電視同懷舊遊戲吸引。展商「香港復古遊戲展覽」創辦人Dixon表示，攤位將會擺放5至6部復古遊戲機，包括1977年的「雅達利」(ATARI)遊戲機，80年代紅極一時的任天堂紅白機，以及90年代的超級任天堂系列，更會大玩多款經典遊戲，包括Super Mario、魂斗羅及沙羅曼蛇等。試玩一輪， Ray啲童年回憶即刻返晒嚟。到時仲有十幾位網絡紅人如達哥及Hana Tam等，將罕有同台比併，而本地「街霸」電競選手紅人Humanbomb駐場接受街客一對一挑戰。
至於主打的電競及電玩產品體驗，展商亞萃電子競技由3名「90後」年輕人創立，創辦人之一Cyrus笑指，3人原本想當職業電競選手，後來創立電競椅品牌Zenox，推出新產品升降電競枱及電競椅，主打中高消費客群，其中升降電競枱原價6,690元，展場價4,950元。