旅遊達人項明生昨日在書展舉行新書《提前退休3：坐遊輪遊冰島、大西洋、太平洋》分享會，請來陶傑做主持、方健儀、車淑梅、張文新、查小欣同爆機達哥等城中KOL名人撐場。承住去年榮獲有「出版界奧斯卡」之稱的金閱獎個勢，今年就帶大家坐5艘不同郵輪，探索冰島、大西洋、太平洋等不同水域。
James於書展後馬上要去四國香川縣拍攝，原來佢已獲委任為香川旅遊大使，不忘hard sell下：「最想去直島，草間彌生的大南瓜等咗我好多年！而家高松直飛香港，方便咗好多倍！機票都係61蚊港幣咋，抵到爛啦！」
佢笑言，自己學緊杜如風，10月會帶團去韓國睇楓葉，並自嘲處男下海，做三陪，日頭陪影相，夜晚陪食飯、陪傾偈，仲會大開金口，與眾同樂。團推出一個月唔到就已爆滿，現在考慮食住個勢，加開一團。遲下仲計劃帶深度團去京都同奈良等。咁密密帶豪華名人團，豈不是豬籠入水？他哈哈笑：「我的新書都是做慈善，版稅全數捐俾大覺福行做老人的善終服務，可能福有攸歸啩！」