朋友新婚，兩口子放工歸家已夜，怕買餸煮飯麻煩，唯有餐餐出街食，殊不健康。我於是建議蒸水蛋，和隔夜牛腩撈麵一樣快、靚、正！
朋友表示，過往蒸蛋非常失敗，蒸得太老，咕窿處處，唔好睇，唔好食。我的煮法如下：
1.蛋預早從雪櫃取出，室溫放暖；
2.蛋和水的比例為1：1.3；
3.先打勻雞蛋，後加水，再用密網篩隔走泡沫，讓蛋漿流落碟內，再用匙羹撈走蛋漿面僅餘泡沫；
4.蒸蛋勿放飯面，太易過火，應用鑊燒滾水，用高腳架蒸；
5.為何高腳？並非因高佬蒸蛋，而是滾水接觸到碟底，令碟底發滾，變成熱碟煮蛋，蛋就過火；
6.上蓋後，用中細火蒸，時間長短視乎火力、廚具傳熱保溫功能、蛋漿厚薄和室溫，如天冷，時間要稍為延長；
7. 初試啼聲，可3至5分鐘後打開鑊蓋，目測蛋是否已熟，若蛋漿未完全凝固，上蓋再蒸；
8. 蛋一凝固，取出加麻油和豉油，即享又香又滑蒸水蛋。勿蒸過龍。
如嫌水蒸蛋味寡，可置瑤柱、切碎蝦乾或豬肉碎於碟底，瑤柱和蝦乾水可留用加入打勻後的雞蛋，風味更佳。 至於豬肉需先用少量豉油、糖和紹興酒撈勻，先蒸至半熟，再加蛋漿，蒸至全熟。如用蝦乾水蒸蛋，因有鹹味，需酌量減少豉油。
此餸只需十多分鐘可完成，快過煮飯，非常適合在職父母。
如嘴刁，前輩教路，蛋漿分層蒸，熟一層蛋，鋪一層配料，再加蛋蒸，如此類推，令配料平均置於蛋中，不會好似梁振英的支持度咁——全面沉底。