牛雜，呢款香港街頭小食由細食到大，所以喺我心裡佔有一個重要位置，每次見到總會食指大動，而香港普遍做法都係用柱侯醬汁或滷水汁去炆煮，變化不多，直至喺北海道札幌市嘅居酒屋初次接觸到日式牛內臟串燒，一串濃濃醬汁加上微微內臟臊味嘅燒金錢肚，入口超juicy，食味絕不下於廣東滷水，完全俘虜咗我嘅心，日本人做串燒果然厲害，眼界大開。
最近，喺銅鑼灣開咗全港第一間以牛內臟做主打嘅串燒店「牛惣居酎屋」，廿幾款牛內臟全部即叫即燒，牛心牛心管牛大腸牛小腸牛肝牛沙瓜牛草肚牛肺牛膀牛骨髓牛橫隔膜………你噏得出嘅刁鑽部位都有，而且師傅手藝相當到家，燒得香口而不過熟，同我喺札幌食到嘅不遑多讓，以後唔使專登飛去食了；同牛串燒最佳拍檔一定係燒酎，一般以大米、麥、番薯等原材料釀製嘅燒酎，酒精濃度較清酒為高，玩法變化多端，可以淨飲、冷熱飲、加冰、溝綠茶、梳打或者果汁，兼且飲完都唔會宿醉頭痛，卡路里又低，好啱我呢個小胖子飲用，難怪喺日本咁Hit。
牛草肚$32─ 牛嘅第一個胃袋，來自澳洲，配芥末醬鹽燒，食落帶點點內臟臊味，不愧為我最喜歡食嘅部位。
牛骨髓$34─ 美國貨，口感軟嫩可口，配辣味蘿蔔蓉及蔥末，補充鈣嘅天然妙品。
牛心管$32─ 加拿大產嘅牛心管，即係牛嘅大動脈，每隻牛只得一條，同牛歡喜一樣相當稀有，勁有咬口非常特別，送酒一流。
牛小腸$32─ 澳洲和牛牛小腸，只用鹽燒至外層香脆，內裡保持大部分油脂，入口啪一聲，OMG滿口油香，勁邪惡勁好食！咩膽固醇呀痛風呀全部拋諸腦後！必點！
橫隔肌$36─ 人氣部位之一，出晒名嚼勁十足兼牛味濃，有蒜香、Wasabi、黑燒&蜜糖芥末四款醬汁，我比較喜歡Wasabi，少少辛辣有助帶出牛香，呷一口加冰燒酎，おいしい~~
個人心水燒酎推介：
期間限定北斗之拳 X 番薯燒酎
Glass：HK$88 900ml：HK$880
位於佐賀縣鹿島市嘅光武酒造，最新推出《北斗之拳》番薯燒酎系列，酒樽上印上主角圖案及經典台詞，入口味道非常strong，個人覺得雷奧嘅紅遙比健次郎黃金千貫芋酒體更rich，飲完會拋低一句「我的一生沒有絲毫悔恨」。(玩法：加冰)
期間限定北斗之拳 X 番薯燒酎
八千代伝Luther
紅乙女 芝麻燒酎
ぼっち 花生燒酎
八千代伝Luther
Glass：$115720ml：$780
來自鹿兒島，將09年產嘅長期熟成燒酎加17年產嘅燒酎混合而成，代表咗酒造嘅八年歷史，你會感受到新舊交織出來的甜味。(玩法：加暖水)
紅乙女 芝麻燒酎
原材料：芝麻
生產縣：福岡
Glass：$75
720ml：$650
ぼっち 花生燒酎
原材料：花生
Glass：$75
720ml：$650
牛惣居酎屋│銅鑼灣登龍街28號永光中心22樓│2682 3302│星期一至日6:00pm~1:00am