香港終於有自己嘅清酒本地種植山田錦

香港人真係好鍾意食日本嘢，無論係Donki定係Omakase，開完一間又一間，連日本清酒，香港都係最大進口地區之一，係勁嘅！不過呢位阿Tom仲勁，職業係品牌顧問嘅佢，因為工作關係認識到本地農業市場生態，加上本身超鍾意飲清酒，喺香港種酒米呢個念頭就慢慢萌生了。

本地種植日本清酒米
阿Tom喺2017年開始，從日本商買下山田錦、五百萬石及雄町等日本米的種子，嘗試以不同米種種植，最終喺舊年成立「香港酒造」，並在大帽山租下超過二萬呎農地。經過一番努力，終於成功在香港第一次種出酒米之王——山田錦！有酒米之王喺手，都要有好嘅酒造配合，阿Tom找來有157年歷史嘅酒造「花の舞」合作，全世界第一支「香港農作‧日本製造」嘅清酒「沈清」橫空出世。

奇楠沉香入饌極有香港代表性
若然你熟悉香港地名來源，應該知道香港個「香」字同沉香有關，從明朝時開始，香港盛產莞香兼且係香料集散中轉港口，經石排灣運銷往世界各地，而石排灣又係香市港口，以運香木出口而著名，所以稱為香港。阿Tom覺得單單使用本地種植山田錦，還未夠代表性，決定加入香港最古老味道，沉香中極品——奇楠沉香。讓酒友品嘗「沈清」時，感受一下香港百年前漁港及交易港時嘅古早味道。