土下座除咗打機也鍾意動漫，當中《死神BLEACH》更係重溫咗幾次，因此見到剛發行嘅改編手遊《死神：羈絆之刃》當然即試！老實講，新世代動漫嚟計，《死神BLEACH》未係似《鬼滅之刃》、《進擊的巨人》呢類神作，不過題材及角色就肯定好適合做遊戲，而且不乏死忠fans，加上有大量原著素材可以發揮，其實只要做好基本就唔難引到人課金啦。同想像嘅唔同，睇返資料，遊戲係由日本GREE同韓國Damo Games共同研發，玩法睇落有啲似前年嘅《一拳超人》，同樣有大量角色、場景及劇情出現喺遊戲入面，本地宣傳攻勢非常之強，最buy佢哋搵咗徐天佑做代言，大家香港人明就明！然而都要客觀啲講，遊戲水準就令人覺得頗為失望，首先唔好以為係類似《一拳超人》嘅「換皮game」(即係遊戲內容接近一樣，只係換上唔同題材同角色)，相反遊戲流程都幾老舊，先唔講「每日迷宮」呢啲玩法，戰鬥系統需要睇準時機撳掣駁招，個感覺同好幾年前一款曾經橫掃中國手遊市場嘅《拳皇98終極之戰OL》非常相似，加上角色甚至冇Live2D郁動效果，因此明明韓國都係上年10月先出，但就真係完全冇新game感覺。