話說2017年1月，Square Enix曾發表過會同當時如日中天嘅Marvel合作一個叫「Project Avengers」嘅項目，最終證實就係由曾經開發過《Tomb Raider》系列Crystal Dynamics製作嘅《Marvel’s Avengers》。遊戲由今年5月延期到9月頭才推出，等完又等，土下座同好多人一樣極度期待呢隻遊戲，但……實在好可惜，《Marvel's Avengers》最終完全去唔到應有水平，甚至有令人希望從來冇呢隻game出現嘅失望之情。首先最大問題係單機模式，唔知係因為政治正確定單純想捧紅Ms. Marvel，竟然係以佢做主角，要知道呢個角色本身喺外國都唔屬一線，知名度不足亦唔特別有個人魅力，結果反而仲被年輕玩家笑係抄《One Piece》嘅路飛；其次係遊戲玩法明顯遷就Online模式設計，就算玩故事模式都好，玩家都係控制角色喺一個大地圖搵寶箱、守據點，單調程度有如玩緊手機Game；至於吹到好大嘅Online模式，俾到大家最大印象係「BUG」，上架首日甚至冇人成功連線玩到，可以話唔應該係大作會有嘅問題。遊戲唔得，其實電影世界嘅Marvel，喺《無限之戰》以及俾Disney收購後都出現好大問題，估計往後日子Marvel都好難再現昔日輝煌。