講起GungHo,大家都會諗起《Puzzle and Dragons》呢隻改變咗世界潮流嘅神作,曾經係年度手遊收入冠軍,令GungHo市值曾經仲高過任天堂,絕對係傳奇遊戲。但可惜,PAD之後就接近冇再推出過一隻真係似樣、引起全球熱潮嘅遊戲,同時PAD亦明顯去到末期,直到今時今日都冇為新手機尺寸更新,圖像同介面都同以前冇分別。所以,呢隻聲稱由製作人山本大介主理嘅新作《Chrono Magia》,就更受到全城期待。不過,土下座試玩咗一個鐘,真係彈多過讚,要知道今時今日手遊已經進化到一個新世界,但呢隻新作不但畫面跟唔上時代,連介面同流程各方面都有種舊時代感,更要命係,實在無法相信仲有一間世界級嘅手遊公司竟然唔同步支援多地區語言,先天少咗一批中港台嘅中文玩家,睇怕都好難大流行啦。