新世代主機大戰由Xbox Series X｜S正式推出而展開！同日推出仲有Ubisoft大作《刺客教條：維京紀元》，咁到底呢個陣容贏唔贏到話題同玩家嘅心？答案係，暫時都贏晒！其中一個原因係，對手PlayStation 5出師不利，先係因為主機供不應求、預購方式考慮不周而俾玩家鬧爆，再嚟係喺冇機嘅情況下依然大做廣告，玩家自然有「攞景定贈興」嘅感覺，得罪粉絲係其一；到最近為配合肺炎疫情，決定全部門市冇實機賣，嚴重影響Game舖難得嘅收入同生計，估計唔少店會因此執笠，得罪零售係其二；到《維京紀元》嘅PS版，為配合日本CERO分級制度，修正咗唔少暴力血腥及裸露內容，簡稱「閹割版」，令遊戲入面嘅真實感大跌之餘，遊戲本身亦唔夠原汁原味，搞到唔少明明唔受影響嘅外國人都當笑話講，得罪玩家係其三。故以土下座所見，以往「玩Xbox俾人笑」嘅風氣已經喺短短幾個月之間完全逆轉，唔少Xbox玩家走去PlayStation嘅FB專頁踩場，氣氛熱烈可謂從未見過。睇返PS5首發獨佔大作《Marvel’s Spider-Man: Miles Morales》雖然也強勁，不過其實都有PS4版本，當唔少人都有PS4，而PS5又難買嘅情況下，即時減低PS5嘅討論度。另一邊廂Xbox Game Pass嘅吸引力開始愈來愈多人留意，$119任玩真唔講得笑！就咁睇嚟，今年內極有可能係Xbox Series X｜S嘅世界，Sony都係留力等下隻大作再反擊啦，不過唔好再係「閹割版」囉。