本周五就係PlayStation 5在港正式推出嘅日子，經過兩周Xbox Series X｜S嘅轟炸，「索粉」終於有機會反擊，不過土下座聽聞供應依然不足，連Xbox都要12月先有補貨，喺香港更受歡迎嘅PS5根本一機難求。現階段雖唔知PS5到底有幾爆，但正如之前所講，Xbox今次認真來勢洶洶，兩部機喺24小時內已經賣出超過140萬部，如果唔係同樣供不應求相信呢兩個星期或已分咗勝負。不過，Xbox總監Phil Spencer就似乎唔係太在意主機銷量破紀錄，反而更著重喺佢哋大推嘅Xbox Game Pass上面。佢甚至已經冇再將Sony同任天堂當成對手，因為佢早就將重心放咗喺「雲遊戲」(Cloud Gaming)，主動公開Xbox Game Pass已經有1,500萬用戶，假設每個用戶每月平均花100蚊，平台一個月嘅收入已經係十幾億！難怪可以大膽同EA合作，又天價收購Bethesda，佢仲預言無論PS5定Xbox，主機銷量都會比以前少！此言一出，好明顯「Xbox VS PS」已經變成我哋一廂情願嘅過去式，微軟而家係創造緊全新嘅打機模式同習慣，大家都真係要認真睇睇微軟之後會點玩落去！