有老友話有一個朋友以BNO去了英國，打算長住，第一件事就是買樓，買樓當然冇問題，但到銀行申請按揭時，竟然不獲批核，更加唔好講甚麼H按、P按及現金回贈等。現在搞到他的朋友發晒癲，我話在外國買樓，大多數有一條銀行按揭貸款條文，如果得唔到銀行貸款，買方是有權不成交，除非買方在買樓時願意刪除這條款，而事實上，這項條文很多時都會被刪除，因為賣家會話，已經有另外一個買家俾到價，如果唔刪除就唔會賣，而香港又沒有這項條文，所以，很多時都會接受賣方的要求。
我問老友，他的朋友究竟要申請幾多成按揭，原來是八成，怪不得銀行不批核，就算在香港，亦只有1,000萬元以下的住宅單位才可以申請八成按揭，同時按揭保險公司會「驗屍咁驗」，視乎申請人有冇能力還款。在英國，銀行家睇從香港去的人只是一批未合資格的難民，5年之後唔知是否可以申請移民，如果批八成按揭，5年之後申請人被遣返，樓宇市值下跌，銀行可能會受到損失。所以，寧願現在不批核，換句話說，就算在民間，英國人仍然未當用BNO去的香港人是自己人，香港人以為已經移民去了英國，只不過是一廂情願想法。
作者紀惠集團行政總裁