近日恆大又傳出債台高築，有爆煲之險，同時國內仲介在香港打廣告大字標題恆大七折賣樓，在某些四、五線城市，幾十萬有一間近千呎的精裝修房，連成本價都未及。由於偏遠地區沒限購，內地很多人夾錢都去買返間，自己擺明不會去那麼遠的地方住，但就話留給下一代，概念跟我老婆買Hermes一樣，用唔到咁多個袋，但當買來保值囉。
恆大去年九月傳出一封要求廣東政府幫忙債務危機的文件，兩日後在各大平台同時落架，然後出來澄清沒有財務問題，但沒否認文件中巨細無遺的內容，事實真偽留讀者判斷。問題是作為投資者或者消費者，到底這類樓買唔買得過？
從樓房質素而言，發展商急賣樓湊錢，急住起樓交貨，最差情況是承建商接標價太低，將貨就價交垃圾樓。至於安全度方面，某些屋苑要求買家一次過付全款，才能拿到折扣，有些更是已按了給銀行，要加簽附加條款，若然發展商違約，買家有機會收不到樓。往好方面看，國內大發展商還沒有出現爛尾樓的情況，所以又未必需要看得太灰。
重點是在二手市場，這些地區連國內人也嫌偏遠，只買不住，空置率一定非常高，極端的話可能形成另一個鬼城，想賣出套現時，誰會接貨？自住又不會，即是得屋無所用。這便變成消費而不是投資，雖然已重複N次，再講多一次，不是全世界的樓市都好似香港樓一樣，低市場幾個巴仙就會有人承接，減五成又到個賣家唔肯，所以呢個世界點會冇「賣唔出，租唔去」嘅樓呢？