虛擬幣價值可大升大跌。(資料圖片)
(字幕：本文純屬虛構，如有雷同，實屬不幸。)
上篇講到，在金主鄭至誠，以及有多年「搵食」經驗的堅哥和成哥幫助下，尖頭仔順利建立了成功的「虛擬幣KOL」形象，並引來一大班信眾，同時成功開班教授如何炒作虛擬幣，同時也推出一部貴得離奇的「掘礦機」，售出數百部，套現數千萬元，扣除成本後亦賺得盤滿砵滿。於是鄭至誠亦開始他下一步的計劃，同手下堅哥一齊找他的20年戰友侯賽因協助。
侯賽因(裝認真)：「我是股神的傳人，你哋呢班『死老千』想偷我雞，冇咁易。」
至誠(磁性聲線)：「當然記得，每一次你都是主謀。我等了這麼久，就是在等這一刻。你完全不夠證據檢舉我，你不要再搞我，再搞我對你不客氣。」
侯賽因：「好兄弟，真是寶刀未老。」
至誠：「好兄弟，有好事當然第一時間益你啦。」
侯賽因：「有咩大茶飯找我先？」
至誠：「呢排我哋捧了一個虛擬幣KOL尖頭仔，賺了唔少錢，打算發大來搞，捧他做上市公司主席，我知你在中國同中東識唔少猛人，又有一隻就來執、但街貨唔多GEM仔殼，打算改頭換面做虛擬幣齊齊搵真銀，有無得搞先。」
侯賽因：「有得搞，打算點做？」
至誠：「首先我哋搞隻虛擬幣叫『堅幣』，一開始就給些真正友好先，自己做莊自己炒，炒到堆幣值50億元。然後我哋用尖頭仔成立一個10億元的『堅幣基金』，買下我哋自己友20%份額，並聲稱會借殼上市，保證呢班人有30%回報，到時會付等值的股票作為回報。」
堅哥：「呢10億元一年都要3億元利息，無錢俾人點算？」
至誠：「傻仔。我哋只需要俾股票人就得。首先，將『堅幣基金』得來的錢炒侯賽因隻股，用幾千萬元打上15億元，然後我哋用6億元買入他60%股權，但實際上剩下10%亦是我們的，權作我們高價買入暗手，尖頭仔就做公司主席。剩下再用少量成交將市值打上40億元，之後再將『堅幣基金』持有『堅幣』份額以13億元注入公司，將市值推到50幾億元，然後維持一段時間，等公司加入港股通及指數成分股，引入一些被動投資基金，如果當再進行一些大型收購，例如收購日本其中幾間虛擬幣交易所，整合一下市場，造一些夢想，為了收購可以再批股給基金集資，等市場流通性大了，再將股份分派給『堅幣基金』基金投資者，股價基礎穩固了，我們將侯賽因手上的暗手賣出，套現10億、8億元，咁大家就發達啦！如果出事，只是尖頭仔同成仔出事，我哋冇手尾。」
堅哥、侯賽因(大聲附和)：「果然係好橋！」
最後，尖頭仔成功變成身價數十億元的上市公司主席，幕後人亦齊齊將虛變實賺真銀。
(劇終。)