復賽前，本欄曾預計屈福特冇鬥心，護級最危；結果佢哋唔只冇乜鬥心，仲剛請走上任僅數月嘅波士皮雅臣，一季第三度炒領隊。好彩比佢哋更不濟嘅，暫時仲有3隊，「黃蜂」(Hornets)屈福特先咁大膽今晚鬥曼城前換帥。皮雅臣其實係近5年呢隻「蜂」第六位正式教頭，勝率亦係最高有35%；上任前球隊得9分包尾，打到依家排尾四壓住今晚都出場迎戰阿仙奴嘅尾三阿士東維拉，已有交代。只不過隊長迪尼復賽前唔願操，隊波一度冇晒停擺前嘅銳氣，皮雅臣落得炒魷收場，不過呢類「中下游救星」從來唔怕冇工開。講開呢隻「蜂」，近倫敦西北面，但唔屬首都球會，咁亂嘅管理手法喺英超唔會留得耐；反而英冠「三哥」、西倫敦球會「蜜蜂」(Bees)賓福特，似今屆英超奇兵錫菲聯，樸實無華，喺明晚英冠煞科戰會決定可唔可以直接升班；唔得都仲有升班附加賽玩，預測決賽最強對手係另一西倫敦球會富咸。到時溫布萊唔只有倫敦雙雄爭英足盃，再加插西倫敦兵團爭升英超的話，都幾有趣。
日報