阿仙奴嘅巴西技術總監伊度，今夏豪花15億港元買咗一班唔似值咁貴嘅年輕人返嚟，錄得聯賽開季3連敗。當時風頭火勢，巴西人仲夠膽上電視台受訪，任你圍插佢堅持話係為阿仙奴未來而戰。英超好現實，禍福難料，講未來有時更係笑話；球王C朗回歸，之前搶晒Fo嘅曼聯近4戰3敗，嚟緊鬥維拉利爾同愛華頓都唔易踢，輪到主帥蘇B壓力大。
兵工廠反彈，欣賞達sir配合到伊度，重用年輕人嘅膽識，同喺比賽中嘅推進節奏。新防線平均年齡得23歲、貴價中場湯馬士柏迪(派對)開始入局，係隊波轉勢嘅關鍵；入熱刺第2球，由龍門起只傳咗6腳波。大利阿仙奴係今季免踢歐洲賽，下月初起鬥白禮頓、水晶宮同維拉，博到聯賽6連勝，呢個「反底派對」先叫開始。仲有今夏全球最高轉會費排第5嘅中堅賓韋特，前一場回傳乏力差啲瀨嘢，今場表現亦唔及「降班門將」蘭斯達爾同近2場防守數據靚到爆嘅富安健洋，如果連「水貨賓」都入埋局，阿仙奴博入返前6都唔係奢望。