Ad Block Ad Block
體育
2021-06-15 04:30:00
日報

強隊踢主場威力倍添

分享:

延後一年嘅歐國盃決賽周首輪各比賽即見激情盡現,可觀性強。丹麥遇突發事件主場爆冷輸波不足為辱,預計主場一方,喺重要性唔高嘅首圈分組賽,仍可秤先;其中「三獅兵團」登場即小勝「格仔兵團」,輿論捧起主帥修夫基。喺炎熱下踢日場,修帥聰明地踢得保守,排陣欲蓋彌彰,基本上喺隊波大把在手,人腳選擇又多;幾可肯定禮拜五鬥兄弟波蘇格蘭先會稍見真章,尤其對手左路側擊極強,包括有利物浦嘅安德魯羅拔臣同阿仙奴嘅基蘭泰亞尼,三獅鬥呢支鬥志頂級嘅另一風笛之師格仔兵團,比賽更令英迷期待,亦會進一步揭開三獅底牌。現代足球大賽講實力同變招能力之餘,團結係爭霸嘅極重要元素。無名防中簡迪就算跑動已能覆蓋全地球,基利安麥巴比已係未來球王大熱;但從來內部團結成大問號兼分組賽3場全冇地利嘅「高盧雄雞」,今晚面對講紀律、講機動嘅「日耳曼兵團」,小心單係對手一個「敗家仔」迪姆華拿已能搗破法國防線,破近5次交手不勝魔咒。

請接受以下私隱政策及免責聲明,以示你同意am730內之私隱政策及免責聲明。了解更多
接受