德甲話咁快剩番4輪埋尾，拜仁慕尼黑多取兩場勝仗可圓8連霸，即最快香港時間6月17日凌晨時分，鬥尾二嘅雲達不來梅後即成事，比英超重啟還早一天；四大聯賽嘅西甲同意甲會前後夾住英超相繼重開，冇歐國盃嘅2020年夏天，球迷估唔到更充實。重啟嘅德甲打咗5輪加1場補賽，共踢咗46場，除全部閉門外，仲引入國際足協一場可換5人嘅今年特設新例；對其他未重開嘅三大聯賽，指標性會強。閉門下，雖然某啲球隊嘅主隊花盡心思，又坐滿紙板球迷又現場播放強勁打氣聲，但主場威力勁減係不爭事實，德甲重開暫時主勝率大跌至僅剩兩成，比重開前四成差得遠。
另外，入球率上升，平均每場剛好3球，不過撇開獨大拜仁重啟後5戰全勝轟入17球，喺密密踢下，上周9場總入球已跌至得22球。好似剛啱禮拜日德甲3場悶戰，只見中下型班球員質素參差，多兩個換人名額幫助唔大。嚟緊「三大」相繼復賽，主場唔重要，邊隊有16人精兵，邊隊先最著數。