Ad Block Ad Block
體育
2021-03-30 04:30:00
日報

捷克上位屠「龍」在望

分享:

江山代有人才出,歐洲講緊嘅「代」,轉得好快。除傳統強國外,上一代講緊小國冰島同威爾斯喺2016年歐國盃分組賽發難、2018年世盃嘅「格仔兵」克羅地亞歷史性殺入決賽,仍津津樂道。但呢3國轉眼數年戰績快速走低;近期輪到接連喺世盃外,殺敗同組大敵荷蘭及挪威嘅土耳其,同潛質更厚嘅捷克上位。

捷克喺04年歐國盃嘅盛世,由尼維特、真高拿、巴路士同路斯基幾位頂級球星帶領,殺入4強,記憶猶深;之後至上年再次冒起,得力於國內勁旅布拉格斯拉維亞彈起,英超韋斯咸慧眼先後撬走對方嘅湯馬士蘇錫克同華迪美高法爾,呢兩間球會今季走勢有目共睹。槌仔幫正挑戰英超前4,布軍入歐霸8強會鬥阿仙奴。現時國家隊骨幹,亦係由呢支國內班霸主力,加埋5大外流兵組成,合作無間,質素有保證,上仗和到比利時,唔簡單;國家隊成員排住隊去西歐掘金,戰意唔同列強球星hea踢世盃外,今晚作客仲喺由加里夫巴利一人硬撐嘅「紅龍」威爾斯,睇怕捷克屠龍在望。

請接受以下私隱政策及免責聲明,以示你同意am730內之私隱政策及免責聲明。了解更多
接受