Ad Block Ad Block
體育
2020-07-14 04:30:00
日報

摩佬悶蛋戰術

分享:

英超倫敦球會唔爭氣,計埋今季,只得車仔近10季兩次封王英超,「藍戰士」更喺呢10季同阿仙奴、熱刺各攞過一次亞軍;相反曼市雙雄同利物浦,同期夾埋攞7冠7亞。今季倫敦兵團中,韋斯咸同屈福特本周五仲要碰頭打保命大戰,水晶宮年年夠數季尾跌就跌watt;而倫敦球會近年最鍾意坐嘅季軍位,亦因車仔啱啱吞錫菲聯3蛋,變得唔穩陣。車仔冇諗過跌出前四而失卻來季歐聯席位,所以先花過億英鎊簽薛耶治同迪姆華拿;阿仙奴仲係嗰幾位仁兄打後防,入不敷支,少帥阿迪達焗用小兵睇未來。熱刺孭新球場巨債,今季因疫情收入大減,連還利息都困難,估值2億鎊嘅哈利卡尼今夏放唔放走都兩難。佢哋復賽後踢過6場入得7球,其中仲有兩球係烏龍波,一貫摩連奴戰術本色;之前鬥般尼茅夫受困密集零射門中框,剛戰變身縮後玩死阿仙奴。熱刺今季仲有3場波踢,就算打唔返上前列踢到歐洲賽,搞到冇錢買人,都仲有穩陣無比嘅摩佬悶蛋戰術,來季跟列強周旋。

請接受以下私隱政策及免責聲明,以示你同意am730內之私隱政策及免責聲明。了解更多
接受