頂級領隊有一張好靚嘅CV，通常唔愁冇好工揾上門，摩連奴係一最佳例子；遊走英、意及西3個頂級聯賽，但對上一個球會重要錦標係2017年幫曼聯攞歐霸；對上一份工喺熱刺一事無成，執教勝率跌至貼近僅五成，但轉頭又有羅馬招手。來季意甲盟主國米冇咗干地，撬走拉素嘅小恩沙基掌帥印、祖記食回頭草，唔要少帥派路揾返冠軍教頭艾基利，即係今屆前7位球隊教得最耐嘅已係喺阿特蘭大5年嘅加斯柏連尼。意甲亂局，羅馬來季有機會參加第3級水平嘅歐協聯，摩佬有計了。
干地挾英超(車仔)、意甲冠軍教頭身份再升呢，又未去過西甲，皇馬同巴塞都可以考慮下。仲有一位CV更勁，當屬法國球王施丹。喺陣容老退中嘅皇馬，今屆西甲僅輸畀冠軍馬體會、歐聯四強負應屆盟主車仔，離開唔失禮。呢位光頭佬之前替皇馬喺歐聯三連霸又攞過西甲，咁嘅卡士係時候去英超一展所長。一直喺哥帥手下無緣稱霸歐聯嘅曼城，同近年黯然失色嘅曼聯，有豐厚財力先配得起施丹嘅級數。