歐洲球壇今個轉會窗好激，但開季冇耐又因國際賽期殺到要冷卻。兩大球王、美斯喺PSG啱啱首次落場踢唔夠30分鐘0射門。C朗回歸曼聯，但人冇喺曼市，先要幫葡萄牙明天喺世盃外大戰愛爾蘭；之後國家隊嗰兩場踢唔踢都冇所謂，最緊要9.11曼聯奧脫福鬥紐卡素，平安喺現場同魔迷say hi。
呢期嘅太公波又唔係關鍵大戰，加埋疫情肆虐，球會更唔願意俾啲主力球星「越洲」離隊。阿根廷同巴西更俾英國政府列為「紅色警報」區域，即係如果英超兵返咗南美洲踢國家隊，回英國要喺酒店隔離10日，再復操跟住話咁快就到10月國際賽期，成單嘢好搞笑。英超大生意，賽會講明唔俾球員去「紅色警報」區域踢國際賽，結果排榜首嘅巴西好聽話，今期一位英超兵都唔選；阿根廷唔敢托大，選4位英超兵踢包括作客巴西嘅世盃外大戰。疫情下，英超傳統Big Six今夏重要嘅南美兵收購就只得熱刺購阿根廷中堅基斯甸羅美路，非洲新兵更幾近絕跡。貨源局限，唔怪得「老中青」嘅歐洲兵同本土兵都炒到咁貴。