老兵利季初。球王C朗以36歲半回歸曼聯，3戰全踢正選入4球，英超體力化暫時難唔倒呢位葡國球王；不過如果紅魔條條戰線都要靠佢打箭頭衝鋒陷陣，好似上次歐聯鬥年青人，波士蘇斯克查換走佢隊波臨尾香，C朗又愛挺身而出，鋪鋪硬仗真係未必頂到成季。再睇返今屆暫時10大最老英超出場球員紀錄，全部上輪英超都有出場，唔計當中4個門將，場上「6老」最大年紀係明天37歲生日嘅車仔中堅堤亞高施華；之後到C朗、費蘭甸奴、艾舒利楊格、占士米拿同摩天奴。最老嗰兩個，喺隊波最勁。好似施華啱啱場倫敦打吡，接應角球壓住熱刺兩個球員頂入，騰空力唔差得過C朗；成場又搞到射手哈利卡尼無啖好食，成支定海神針，評分全場最高，搶鏡過下半場奇兵尼高路簡迪。車仔主帥杜曹教咗未夠一年，場上調動一流外，佢叻在善用上手林柏特成手寶藏；車仔今屆踢咗7場波，杜曹只係用過施華打3次正選，球隊未失過波。你有C朗，我有施華，睇下終點前邊個先倒下。
日報