英超話咁快回歸，睇升班馬賽事嘅新鮮感會較大。富咸隔季重返即大敗，單係比賽速度絕對唔係英超水平；西布朗懷舊感強烈，除咗見番滄桑咗好多嘅比歷執教，擔正嘅守將基蘭基比斯、基爾巴特利同4年前嘅威爾斯歐國盃英雄之一笠臣簡奴後備出場，英超迷好熟；但一眾「舊電池」，俾班「小狐狸」段段快放，吞3蛋算少，今屆降班膽。睇番英超上季3支升班馬，只得諾域治包尾，並成為對上5季英冠冠軍中唯一降班球隊；不過上季英冠冠軍列斯聯，首戰迫到利物浦未停過，個隊型好正，應有機會挑戰前季狼隊一升班即攞第七嘅佳績。
佢哋最厲害係甩漏多嘅守將羅賓高治係德甲新星，加盟咗只係半個月，進步空間多；其餘主力踢得好全喺英冠打上嚟，朝氣十足，「狂人」比爾沙逆少帥橫行潮流，係今季英超之福。嚟緊第二輪，曼市雙雄加入，但勿忘列斯聯主場招呼富咸，睇有「孔雀」之稱嘅列斯聯嗰種全場壓迫感，真係賞心悅目，今場遇慢速富咸，要「開屏」不難了。