英超球壇圍插阿仙奴少帥阿迪達，英國莊家順水推舟，下一位被炒英超領隊熱到1賠1。阿仙奴今屆係半世紀第一次冇歐洲賽踢，順理成章明晚被安排出席英聯盃次圈，作客鬥英冠超班嘅西布朗，非常尷尬。隊波喺新冠肺炎持續侵襲下，有啲甩皮甩骨，不過就算真係英聯盃出局，之後禮拜日作客再大敗曼城，我都唔信達Sir咁快玩完。
阿仙奴唔係一支輕易炒領隊嘅傳統球會，今夏已豪使1.3億鎊買人，成個球壇笑緊佢哋買貴貨；我諗達Sir嘅理念係盡快清走同棄用包括比利連、拿卡錫迪、哥拉辛拿斯同韋利安等過氣兵，組建一支未來嘅兵工廠。球員成熟係要有機會同時間，總覺得佢想法好似上屆林柏特教車仔，唔同係車仔老細阿巴冇咁嘅耐性，亦唔甘心前4。達Sir捱得過嚟緊兩場波，9月國際賽返嚟對手弱得多。一場波已可扭轉全世界想法，不如留意埋首仗大炒列斯聯嘅曼聯，次仗蘇帥嘅調動遲緩兼面對中型班修咸頓嘅窘局；紅魔今屆矢志封王，格拉沙家族唔一定要再畀面費Sir嘅門生。