以前話巴西兵或南美球員，唔適應英倫嘅寒冷天氣，發揮往往打折扣，不過氣候暖化，加上佢哋喺其他歐洲主要聯賽磨練後，先到英超掘金，識用表現多數對辦；南美幫唔單止成為英超外援一股重要力量，就算睇返啱啱公布嘅巴西國家隊24名大軍名單，英超兵成大戶佔9人。愛華頓前鋒李察利臣喺英超冒起，成巴西重要射手已係異數；今次更令人意外係曼聯中場費特洛迪古斯不「廢」，經歷3年後再入選森巴大軍，或成今夏國家隊各項重要賽事嘅主力防中，其神奇之處，同艾利臣比加今年場內經歷連番失誤、喪父同啱啱助攻破網絕殺對手，可能替紅軍搶到歐聯席位，一啲都唔輸蝕。
最唔識用巴西兵嘅英超強隊，除咗熱刺嘅非一線前鋒盧卡斯莫拉，同今季從賓菲加借用「水貨」卡路士雲尼斯奧斯；阿仙奴應該更覺慚愧，高層伊度係前巴西國家隊經理，應該大把好貨，但隊中4件巴西兵，今季高薪簽入老兵韋利安係超級敗筆，最失望係「巴西希望」加比爾馬天尼利進度徘徊，星途未卜。