香港球迷少睇英冠，所以唔少人今屆先發現原來由狂人比爾沙，帶領升英超嘅列斯聯咁癲咁堅持，嗰種歡迎你攻過來，又全場喪跑喪反攻至力竭，其實係英超其中一種「原味」。不過喺所謂傳統強隊身上，呢種唔計成績，重娛樂球迷嘅本質，近年漸減退。你可以看到曼城全面啞火、今屆6場聯賽勝仗有3場係1比0、阿仙奴射門中框都未識，淪落下游，由摩連奴帶領嘅熱刺，繼續穩守突擊；但剛遇上「狐狸」先縮後，打反擊叻過佢哋，摩老連敗再唔敢打口水戰，砌詞話最好嘅球隊輸波。
口水戰，比爾沙從一而終，由開季首場輸紅軍3比4到啱啱俾曼聯喪炒，都講「我們不會放棄進攻」；但佢老人家嗰種從容，可以從球隊一開波3分鐘輸兩粒，仲俾鏡頭影到坐喺後備席嘆熱飲可見。列斯聯打「4-1-4-1」陣式得一個防中加雲菲臘斯，大膽冒進；失波全英超最多唔緊要、唔識贏強隊唔緊要，喺英超識攻搶3分已好煞食。列斯聯嚟緊聖誕快車鬥般尼同西布朗，靜靜地留喺屋企捧場，都係一種樂事。