尼馬不用傷心

PSG花盡油元，又一年喺歐聯功敗垂成，感覺上愈走愈近，但同組軍方針相似嘅曼城一樣，鬥心一般，班波質素唔平均，可能往後都係得個「近」字。尼馬球齡唔輕，賽後坐喺後備席痛哭唔想上台攞亞軍獎牌，當然同佢近年冇大盃落袋，能力備受質疑有關；又或者傷心佢老友、決賽頂得住「新球王」羅拔仔嘅巴西老中堅堤亞高施華，要離隊去英超揾食。尼馬可能更加擔心PSG前線有冇新血加入，俾佢圓大賽夢，始終迪馬利亞已老、莫路伊卡迪唔太得領隊歡心；最失禮係之前踢英超降班史篤城嘅祖普莫亭全無級數，決賽去到補時，難得基利安麥巴比同尼馬兩大天王造就，呢位喀麥隆人門前失機，來季都係坐多過踢。鬥唔過拜仁，可以返去法甲揾由前拜仁教練尼高高華領軍嘅摩納哥出氣；只見歐聯決賽同日，法甲摩納哥主場鬥蘭斯，主隊防線錯漏極多，幸保1分。級數跟PSG有大段距離嘅球隊，喺法甲多的是，尼馬唔使太傷心。