英超重啟，帶來希望，利物浦首個英超獎盃快到手，曼聯主力陣容變得更強，正守住第五，力保歐洲賽資格；除咗諾域治係降班膽之外，排尾二起嘅對上5隊，全力掙扎避免成為另外兩支降班馬。不過，對於十多年未捧過英超冠軍嘅阿仙奴，今屆更淪為中游分子，現在只祈求盡快收工放暑假。阿仙奴嘅問題一匹布咁長，自雲加走人，換上艾馬利，再到現在嘅主帥阿迪達，差到未見底；遠因係雲加臨走竟用30萬英鎊周薪留奧斯爾，棄阿歷斯山齊士，牽連之後艾馬利唔肯同隊中老臣艾朗藍斯及哥斯尼續約，累死埋自己。
換入走下坡嘅大衛雷斯頂防守中路，同中場全冇一位重心球員，不倫不類，阿仙奴冇中堅冇防中，係十多年未解決過嘅問題，今季問題就更嚴重。如今射手奧巴美揚唔續約居多，奧斯爾冇人會要，復賽踢兩場全輸傷3件，加埋「地雷斯」領紅要停埋嚟緊作客鬥修咸頓；阿仙奴變成英超重啟後最災難、最失禮嘅一隊。想攬住月尾重開嘅英足盃當「水泡」？8強鬥錫菲聯已難搞。