疫情下，連韓職都可以喺香港免費電視台睇到，對上3個周末晚晚睇德甲嘅更大不乏人，班霸拜仁慕尼黑話咁快分數上再放遠啲，冧莊高唱；最亮麗係睇到該隊嘅加拿大籍嘅非洲「跑王」艾方素戴維斯，只見佢場場成條左路打晒，19歲仔注定走紅。睇番停擺前嘅英超，打起咗阿仙奴小伙子布卡約沙卡，同樣因防線缺人要由左翼調後踢左閘嘅拜仁小將艾方素戴維斯，二人樣貌有幾分相似；但戴維斯更大隻同速度更快，2千萬美元由美職撬過來，認真超值。
德甲復賽後密集踢，但佢踢足4場，錄得2入球1助攻唔識停，表現搶鏡過隊中老大哥「羅拔仔」同湯馬士梅拿；喺非洲難民營出生，跟住喺加拿大成長兼入籍嘅佢，中學時代已係短跑能手，據報百米跑到11秒左右，早被譽為傑出跑手。可惜加拿大國家隊好難入到國際大賽，佢要將名聲推高，稍後復賽嘅歐聯會係最佳舞台。各地頂級聯賽相繼復賽後，「一周3賽」當常事，隊波多幾位年輕又餓波嘅「快馬」，有助戰績，值得備忘。