史上最強10號仔包括馬勒當拿、比利、施丹、朗拿甸奴、羅拔圖巴治奧等，以及現役嘅美斯，用超強個人技術策動進攻，俘虜球迷。就算英超一向講求體力，但要求史上最強10號主人嘅奧雲、柏金、朗尼，雲佩斯及夏薩特勤力回防，嘥料！如今10號波衫唔再巴閉，角色淡化，足球講整體多於個人技術。
上季英超各隊10號波衫主人，最似樣係哈利卡尼、基亞利殊及占士麥迪臣3位三獅國腳。人工剛加3倍續約嘅英格蘭小將伊美路維，明天度過21歲生日，阿仙奴送埋件10號波衫俾佢，係留人嘅籌碼，但要再有大幅進步，先孭到重飛；主帥阿迪達其實最睇重3號基蘭泰亞尼同7號布卡約沙卡。今屆英超最令人期待嘅10號，依然係射術、身型、體力及球品，已具備巨星風範嘅哈利卡尼；如果佢今夏離開熱刺，代替阿古路，成為曼城新10號，喺英超爭標會掀起巨浪。
若講永遠不能忘記嘅10號對決，只會係小弟兒時偶像、精工嘅胡國雄喺大球場鬥小保加嘅馬勒當拿，人事全非，美事只能回味。