短短4天內去完希臘，又返英國北上作客嘅阿仙奴，排出「弱陣」竟能反勝英超三甲分子「狐狸」，近排少踢嘅拿卡錫迪，尼高拉斯比比同韋利安，擔正分別交出入球同助攻，證明足球喺疫情下，往往係主力健康同體力嘅結合。
英超季前投票決定唔益強隊，限每場只換3後備，再打埋歐洲賽嘅話，以「英超傷兵統計」網站排名，終打到謝晒嘅「狐狸」拍住水晶宮，並列榜首，有9人；長期中傷兵咒嘅利物浦有8件。「狐狸」輸埋畀阿仙奴傷多3件，包括今屆英超耀眼新星哈菲班尼斯，中堅大將莊尼伊雲斯同「入球機器」占美華迪。多傷兵未必無因，「狐狸」比賽速率一向超快，而且羅渣士傾向少輪換，34歲嘅華Dee近8天踢足3場超過270分鐘，包括鬥阿仙奴全場0射門到賽後驗出傷埋。羅渣士今季應該諗唔到班波喺英超排到咁高，部署上有啲心雄；明天作客般尼後，禮拜六早場又南下白禮頓，都要殘陣出擊。踢唔停嘅「狐狸」最後會唔會兩頭唔到岸，呢兩場波好關鍵。