撇開高手過招嘅利物浦鬥曼城不分勝負，引證英超「分分」皆辛苦，少見揸流灘外；各大歐洲領頭羊拜仁、阿積士、皇馬、賓菲加同PSG同一日聯賽「破身」，未必係巧合。始終除西甲已變長期亂局，英超只睇4強，其餘上提班霸，聯賽間中失3分當蚊針；反而要留意意甲拿玻里，上屆臨尾香跌落第5失歐聯席位，炒咗激情有餘嘅加度素；今夏換上名帥史巴列堤，加埋非洲射手域陀奧森漢勇熟，同喺富咸借咗另一非洲中場森保安古沙，咁就變長勝軍。不過佢哋聯賽7連勝有唔少水分，最勁係主場贏過失C朗嘅祖記；擅打全場壓迫嘅拿玻里，要博自1990年阿根廷球王馬納當拿後首個聯賽錦標，最強對手可能係同樣冇份踢歐聯，由盃王摩佬統領嘅羅馬。
電影中嘅007都可以有兩個，都可以陣亡；聯賽要長期保不敗封王，喺現今賽場難度高，反而削弱賽事嘅刺激性。一班大球星呢刻最緊要係返歸，踢世盃外報效國家，順便享受一個「泡泡」假期。生死有時，聯賽路遙，呢類「假死」毋須太過介懷。