歐聯4強開戰，法德上下線互撼，外界熱捧PSG同拜仁入決賽，但計近績同一國家球會近7季有3次齊入決賽，密密踢有爆冷條件，大家仲有幾多武器喺手未用盡，會係爭霸關鍵。只見4強後備入波有拜仁嘅菲臘比古天奴、RB萊比錫嘅泰拿阿當斯、PSG嘅祖普莫亭同里昂嘅穆沙迪比利，除咗美國小將阿當斯，其餘全部踢過英超，英超可以叼下光。如果鬥武器未用盡，兩支法國兵會比德國雙雄優勝，PSG有埋基利安麥巴比火速傷愈鋒力更強，今晚劏RB萊比錫呢隻「牛」唔難；拜仁上仗唔留情狂數巴塞，全球like爆冠軍首選，但冷殺手里昂體力足專心打突擊，加埋中前場有迪比同雲尼艾迪拿迪兩位前英超兵傷好，呢場波有得打。話說阿仙奴查緊上季尼高拉斯比比喺法甲天價過檔，有冇被揾笨之嫌；睇反里昂中前場幾個喺今次大賽嘅質素都唔差過比比，踢過富咸嘅穆沙迪比利係其一，年初先以1,000萬英鎊由西甲回流嘅托高伊甘比都好搶鏡。法甲呢類步大力雄嘅前鋒好多，阿仙奴高層心裡有數喇！
日報