Ad Block Ad Block
體育
2020-06-30 04:30:00
日報

等足列斯聯16年

分享:

紅軍提早7輪封王,圓30年英超錦標夢,嚟緊榜首大戰鬥曼城淪為例賽,英超前列爭歐洲席位亦唔算激烈,只得狼隊搞局;最無癮係今屆護級戰,除包尾諾域治冇希望,其餘「四弱」屈福特、韋斯咸、般尼茅夫同阿士東維拉唞咁耐出番嚟,表現更劣。上提呢5隊去到周日晚為止,復賽後合共踢咗12場聯賽錄得2和10負,最恐佈係夾埋入得4球,大家都不值留低,季尾視線不如望低一格嘅英冠升班戰。現居榜首列斯聯名氣響噹噹,十多廿年前叱吒一時,甚至撼動歐洲球壇,原來轉眼已離開英超16年;上屆臨尾腳軟跌落第三,轉戰升班附加賽出局;剛剛大炒富咸,季尾已鬥晒前列球隊,緊接今晚再主場鬥尾二盧頓,有機會擴大優勢,令主張逼搶同主攻嘅「阿根廷狂人」比爾沙可以更接近一嘗執教英超嘅滋味。

本地球迷好耐未睇過英冠直播,既然連韓職復賽都有得免費睇,爭上英超可擸2億英鎊嘅大賽,有關方面係咪可以諗諗季尾買番嚟播;好過眼見英足盃出咗咁勁嘅4強戲碼,想俾錢都睇唔到咁沮喪。

請接受以下私隱政策及免責聲明,以示你同意am730內之私隱政策及免責聲明。了解更多
接受