英超今季娛樂性大減，強隊唔似強隊。計到禮拜日，入球率暫時喺5大聯賽排尾二，每場平均只得2.66球，僅好過2.48球嘅西甲，反而意甲最勁有3.07球。爭霸冇氣氛，護級大戰冇出現過；剩低爭前四踢歐聯成長期話題。嗰種鬱悶，令到英超Big Six早前密謀造反，但快速流產；曼聯球迷更忍唔住借勢反班主，衝入奧脫福搞事，令「雙紅會」被逼改期，逼到曼聯要5日打3場；加埋各前領球隊持續鬥失分，原本冇晒火嘅利物浦領隊高普衝返出嚟，要紅軍贏晒餘下4場，後上攞返歐聯資格。
曼聯躉魔血澎湃，愛會心切，非常時期，你係蘇斯克查會今晚強陣打「狐狸」，然後禮拜四弱陣打利物浦嗎？益李城踢歐聯，點都好過壯大下季打到歐聯嘅死敵利物浦，何況曼聯今季班底拍得住車仔咁厚，每場陣容唔會太弱，更唔似會放生利記。「狐狸」餘下3場表面難打，但鬥完曼聯、之後係留力歐聯決賽嘅車仔同最後一場鬥冇晒heart嘅熱刺，睇下季尾最火熱嘅英超射手伊恩拿祖，會唔會成為「狐狸」季尾「保4救星」。