Ad Block Ad Block
體育
2020-07-28 04:30:00
日報

維拉破英超兩定律

分享:

英超過往有個想法,就係全季攞40分先叫穩陣上岸,但近年強弱更走兩極,喺兩個轉會窗夾埋豪花超過1.5億英鎊嘅升班馬阿士東維拉,靠最後4場波攞8分,累計35分,再創近年尾四球隊留班嘅最低積分紀錄(上兩季尾四球隊同得36分)。維拉亦打破下游隊要靠一位可靠射手保命嘅定律,季初用2,500萬鎊簽入比甲班霸布魯日前鋒韋斯利摩拉斯,代替返車仔嘅譚美阿巴謙,結果前者入得5球兼半季已「打柴」;但球會對比甲前鋒情有獨鍾,喺冬窗再引入身形瘦削嘅薩馬達當護級救星,結果呢位坦桑尼亞人入得1球。

成功總有原因,領隊甸史密夫話喺停擺嗰3個月,翻睇晒球隊今季每一場比賽;但最重要除咗中場主將基亞利殊全季賣命,加上埃及人馬莫特查斯古特復賽後神勇頻頻建功之外,呢4場波佢哋贏水晶宮、阿仙奴,賽和愛華頓同韋斯咸時,咁啱對手當時戰意都有疑點。勤力嘅甸史密夫嚟緊歇暑,相信又要忙於四出招兵買馬,代替準備跳槽大會嘅基亞利殊,為來季維拉保命提早部署。

請接受以下私隱政策及免責聲明,以示你同意am730內之私隱政策及免責聲明。了解更多
接受