C朗、盧卡古兩大上屆意甲神射手離開，回歸英超、西甲雙雄莫財，德甲拜仁獨大，英超班底更超級。撇開今夏使錢最多嘅阿仙奴，苦戰贏「同級」諾域治開齋、而熱刺冇老孫出場，吞水晶宮3蛋太離譜，北倫敦雙雄連續第3季不入前4機會極大。相反英超其餘傳統4強，開季如狼似虎，曼聯、車路士、利物浦同曼城，對比上季同期首4場聯賽分數皆有升幅，開局唔敢怠慢。對比一眾黑馬有啲冇力感，維拉同韋斯咸各有大將離隊、愛華頓用肥賓代肥安做主帥，冇再大力擴軍；只勉強睇好隊內潛質新星多嘅李城係衝擊Big Four嘅要角，但34歲嘅華迪擅打速度，係咪C朗或者伊巴呢類長青箭頭季季咁勁，仍然關鍵。對上5季，英超第4同第5嘅差距，唔多過4分，今屆前4隊太勁，個鴻溝或會擴大。
歐聯分組賽今晚開打，英超Big Four有能力出AB隊，分組賽要過關唔難，競爭氣氛一般；今晚最矚目反而係窮到燶嘅巴塞，迎戰火力超強同唔留手嘅德國班霸拜仁，究竟巴塞係爭氣波，定被大屠殺？