藍月擊潰紅軍，向近4屆3奪英超之路挺進；仲有明晚英足盃16強對史雲斯、月尾歐聯16強鬥慕遜加柏，同埋英聯盃決賽等鬥熱刺，今屆爭四冠王不是夢。哥帥麾下藍月踢法如行雲流水，最值尊重；只不過佢應該估唔到英超新星菲爾科頓進步嘅驚人。
菲爾科爾頓近季後備居多，外界講佢係大衛施華接班人，但哥帥都唔係太重用，或者唔想揠苗助長；而且藍月始終重名牌，鬥利物浦除咗科頓，上陣嘅幾乎全部係高薪挖角過嚟。再講，唔係奇雲迪布尼養傷，唔係阿古路經常「失蹤」、加比爾捷西斯同費倫托利斯唔fit，哥帥幾有謀略都唔會大膽到用更瘦削科頓打「假9號」，去攻紅軍一對夾硬頂檔嘅中路守將。試出彩虹，應可聯想到攻中人才多瀉嘅「三獅兵團」領隊修夫基，往後多一種殺著。再想起幾個月，科頓仲同緊比佢更早成名嘅紅魔格連活特，喺冰島酒店被踢爆嬉春事件後被逐出國家隊；受過教訓後，呢對「孖寶兄弟」逆走，科頓入球、助攻大放送，格連活特極沉，有待振作。