歐聯歐霸今周齊決4強，英超球隊最多可擸5個位，利物浦歐聯返主場鬥食緊老本嘅皇馬，落後2球仍有價講；而阿仙奴喺歐霸要作客捷克，焗攻博贏晉級，心理壓力反而會較細。歐洲波淘汰賽階段，結局往往出人意表，就算首回合領先緊嘅「四冠王候選人」曼城，明晚作客多蒙特都有暗湧。藍月對上3屆全部8強止步，大搞咁多年，始終去唔到歐洲一線，成為戰術大師哥帥嘅遺憾；今次只係攞住1球優勢作客多蒙特，加埋佢哋今屆歐聯之前所遇過嘅4支歐洲對手，冇艾寧夏蘭特咁嘅前鋒級數，藍月防線考驗大。
呢場會係大手交易外，仲會係呢位「未來球王」嘅睇辦戰，傳聞包括曼城、皇馬同PSG，力爭呢位身價逾1億鎊嘅挪威超新星下季過檔；其中曼城錢最多，隊中又冇一個咁嘅衝刺型嘅箭頭，今屆再攞唔到歐聯，再次揮金擴軍係必然，而且夏蘭特老豆當年打過曼城，會易傾啲。佢嘅踢法有啲似熱刺王牌哈利卡尼嘅影子，20歲仔，留喺多蒙特當跳板一季夠皮，係時候英超展翅。