車路士新星基莫亞。
歐國盃賽事過半，未到戲肉，但喜見久沉嘅德國鬥葡萄牙，當決賽咁踢，瘋狂逼搶對手，踢出近年傑作；分組賽強強對碰有咁精彩嘅波，難得！比利時、英格蘭同法國幾支熱門先後見hea踢，未露底牌；反而意大利名氣不響，眾將上位爭做星，爭霸奇兵一路。今晚焦點，當屬三獅鬥捷克，但兩軍攞住4分，提防戰意有疑，尤其英軍主帥修夫基布陣欲蓋彌彰，似乎想留喺淘汰賽搏殺；反而同時間兩支格仔兵團內訌，同樣要贏波先有價講，分組賽揀呢類波先好睇。
蘇格蘭首戰吞捷克兩蛋，表現不似預期；但上仗調整陣容鬥大佬，大獲好評，尾段幾乎贏波。雖然話三獅冇去盡，但喜見蘇格蘭出返基蘭泰亞尼打左閘，麥湯米尼調踢右閘，前鋒用查阿當斯更快更靈活，只可惜「新簡迪」比利基莫亞今場賽前中咗新冠肺炎唔出得。蘇格蘭今場要贏18年世盃亞軍克羅地亞出線，當然唔易；但一班國際賽新仔，放開嚟踢，學下全場逼搶克軍一班老鬼，就算贏唔到，點都唔會一球不入兼出局咁羞家啩。