當今球壇豪嘅球會，離不開法甲PSG、英超曼城同車路士，當中PSG主場首戰賽前一字排開包括美斯等5大新兵晒冷合照，場外先賺個滿堂紅。曼城同係中東「油元」射住，但喺哥迪奧拿領軍多年，總脫唔開當年巴塞大賣嘅踢法Tiki-taka控球在腳，不重球員高度同玩無鋒陣嘅影子；開季即輸俾熱刺，控球比率高、射門多都冇用。藍月1億鎊簽基亞利殊，滿足哥帥嘅踢法；咁如果最終簽唔到全能射手哈利卡尼，會唔會係佢個人嘅執著，月尾轉會關窗前便知。
論眼光，車仔背後嘅管理團隊，近年最醒。上季毫擲逾2億鎊買人贏歐聯；林伯特教唔掂，識得用杜曹。剛用近億鎊簽返7年前放走嘅簽頭盧卡古，你笑呢位魔獸快過氣，其實藍戰士只想用多佢1、2年博英超冠軍。有報道計佢哋今夏暫時淨轉會支出只係150萬鎊，3千多萬鎊放走好有前途嘅英格蘭箭頭譚美阿巴謙去羅馬，但原來有回收條款，2023年夏天可以用雙倍價錢買返；到時舊魔獸用殘，又可能俾前帥摩連奴調教到另一位新魔獸，車仔呢招夠高。