Ad Block Ad Block
體育
2021-04-20 04:30:00
日報

車仔衝三大目標

分享:

歐洲各地主要賽季倒數約最後一個月,喺兵疲馬困下,強隊場場要搏盡亦不免陷入泥沼;只見數天內已見熱刺王牌哈利卡尼、曼城奇雲迪布尼同阿仙奴拿卡錫迪傷出。反而曼聯前線大把貨,已錄得5連勝、車路士人腳更鼎盛,配合年初上任嘅新帥杜曹嘅功力,分分鐘達成擸歐聯、英足盃及攞英超前四嘅三大目標。

杜曹年初上任教車仔19場波,撇開早前無厘頭2比5大敗下游西布朗,其餘18場驚人地僅共失4球,合共亦只有2場敗仗;最神奇係杜曹用嘅中後場人腳,跟季初嘅林柏變化唔大,頂多解凍中堅魯迪格同頂級防中尼高路簡迪傷愈。前線堅決唔用柱躉箭頭,但夏維斯、基斯甸普列錫同薛耶治三大好波之人,成季都冇搏殘過,以守為攻,小勝夠數。車仔今晚英超鬥護級壓力唔大嘅白禮頓,之後聯賽留喺倫敦鬥韋斯咸同富咸;下周中歐聯4強首回合作客鬥成條防線傷晒嘅皇馬,杜曹上任後成手好牌係佢嘅福氣,但德國人嗰種踏實只求成績嘅性格,有啲似當年教車仔嘅摩佬。

請接受以下私隱政策及免責聲明,以示你同意am730內之私隱政策及免責聲明。了解更多
接受